الأحد، 3 يونيو 2012

3- حمارة منقبة !

حمارة منقبة !


فاكر في مرة كنت ف مكان شبيه بالارياف كدة ، زي قرية يعني ، بس مش بالمعنى دة ، منطقة اسمها الحوامدية ف الجيزة ، كنت بزور واحد معرفش يقربلنا اية ، عشان رجلية كانت مكسورة
المهم ، وقبل ماروح هناك وانا ف الطريق ، اتصلت بيا امي كالعادة تفكرني انو لازم اشتري 2 كليو برتقال او موز او اي حاجة عشان مدخلش ع الراجل ايديا فاضية يعني ،
وانا ف الشارع لاحظت حاجة عجيبة جدا ، راجل فلاح كدة ، ماشي ، وحاطط ع ضهر الحمار بتاعة سودة كدة ، ومغمي وش الحمار ، ببتاع اسود كدة برضو
وكلمة بتاع هنا معناها انه حاجة مش عارفها ، عشان بس كلمة بتاع ليها معاني كتير :D
المهم ، الراجل دة وهو ماشي ، الحمار دة خبط ف رصيف كدة ووقع الراجل من علية والحمولة اللي كان شايلها ع ضهرو وراكب فوقيها ،

ولما وقع في ست كبيرة حلوفة كدة فضلت تضحك عليه ، فقالها والله انا خايف " عليها " ، وكنت عايز امشيها بعيد عن الشمس ، فهي عصلجت ف اتخبطت
من كلامه فهمت ان اللي راكبه دة ، مش حمار ، دة حمارة ، انثى الحمار يعني
ولما الراجل دة مشي ، سألت الست الحلوفة اللي كانت بتضحك ، قولتلها حضرتك هو ليه مغمي الحمار كدة ؟
قالتلي هو متشدد شوية ، مش شايف دقنه قد اية يابني ؟
قولتلها ايوة حضرتك مال التشدد بالحمارة يعني ؟
قالتلي ماهو حتى الحمارة كمان منقبها ، زي مراته وبناته الاتنين ، فاستغربت ، وخبطت كف ع قفا واد صغير كان واقف كدة ومشيت .
بهزر ، خبطت كف ع كف ،

المهم بأة ،
طبعا الراجل دة مجنون
بس عارفين ؟
لا مش عارفين ، عرفنا انت
ماشي اعرفكوا
الموقف دة لما بفتكرو بيكون بالنسبالي كالتالي :

1- الراجل المتشدد دة = محمد مرسي
2- الحمارة المنقبة = مصر
3- الست الحلوفة = الشعب
4- لا مفيش رقم 4 بشتغلكوا :D

صدقوني
شٌغل المٌسلم المتشدد سواء اخواني او سلفي الشاغل ، هو المرأة والنقاب
صدقوني لاتكون كل حمارة منقبة ، ودة بالنسبالهم هم مشروع النهضة

انا مش محتاج احكي كتير
بس بقول لكل حلوف بالنسبالو ان مرسي يمسك البلد عادي كدة ، فوق الله يخليك ومتلبسناش ف الحيط
ف حالتنا دي السيئة تٌعم
ومينفعش مصر تباة حمارة منقبة

..

2- لو إستلوحت على اللوح ، مش هيفهم انك بتستلوح !

لو إستلوحت على اللوح ، مش هيفهم انك بتستلوح !

قبل مابدأ كلامي أحب اعرف " اللوح " تعريف عام ، وتعريفي الشخصي
التعريف العام ، وبمنطق ارسطو المجرد المشلول ، يقول ان " اللوح " هو استعارة تصريحية ، بنوصف بيها شخص مبيحسش ، حلوف ، طويل وعريض ، زي لوح السرير بالظبط ، او لوح الخشب كدة
اية الغباوة دي ؟ ماهو لوح السرير هو لوح الخشب ! ، ماعلينا وبعيدا عن غبائي ، هعرف مصطلح " لوح " تعريف شخصي : وهو انه شخص ، احساسه بجسمه وبالناس منعدم ، يعني اللي يجي ف المواصلات يقعض على حجرك وهو مش واخد باله من جسمه ، ولا واخد باله انه مدايقك ، دة مثال بيشرح يعني اية لا بيحس بجسمه ولا بيحس بالناس !

اكيد كلكوا قابلتوا الناس دي ، واكيد في مننا ناس زي " اللوح " ، طيب ،
هيييييييييييييييييييي انت ، تعبان من الناس اللي زي " اللوح " ؟ ، نفسك تلاقي حل ؟
هيييييييييييييييييي انتي ، حاسة ان البلد كلها بتستلوح عليكي ؟ عايزة تلاقي حل ؟
اقري الموضوع
بعيدا عن كمية السخافة اللي ف السطرين اللي فوق ، والألش الرخيص دة ، هقولكوا ابسط الحلول اللي تعملوها مع الشخص " اللوح " :

" لو إستلوحت على اللوح ، مش هيفهم انك بتستلوح "

بمعنى اية ؟ ، هحكيلكوا موقف
وانا ف مرة راكب ميكروباص ، وكعادتي بركب ف تاني كنبة جنب الشباك ، او جنب السواق جنب الشباك ، عشان لايكون ليا دعوة لا اني الم اجرة ، ولا ان واحد يديني فلوس اديها للسواق ، ولا افضل ازعق من ورا واقولو على جنب ياسطى ، ولا في ربع جنية باقي ياسطى يابن ال..... *كلمة عيب .

كنت راكب جنب السواق ، واسمها " جنب " مش "جمب " ! ، من ناحية الشباك ، وكان قاعد مابيني وبين السواق واحد لوح ! ، الراجل دة كان قاعد فاتح رجله وزانقني انا ف الشباك ، فضلت مدايق طول الطريق ، وقعدت افكر ف حلول للموقف اللي انا فيه ،
خلاص طهقت ، رجليا ملزقة ف بعض زي البنات لما بتكون مكسوفة ، وعرقان عرق السنين وطالع عين اهلي
حللت بسرعة شخصية الحلوف اللي جنبي ، وقولت هو اكيد مش قاعد كدة بلطجة ، كل الحكاية انه بس مش حاسس انه مدايقني ،
ومليون ف المية لو انا دايقته ، مش هياخد باله برضو ، فانا اعمل اية ؟
افتح رجلي انا كمان ، وادخل دراعاتي الاتنين وهو اكيد مش هيفهم انه مدايق ،
" إستلـــــــــــــوحت " ، وروحت فاتح رجلي انا كمان ، وزنقته ف السواق ،
وكانت المفاجأة :
ولا حس ، ولا فهم ، ولا ادايق ولا اي حاجة !
" استلوحت ع اللوح ، فمحسش اني بستلوح " .

نصيحة لكل اللي بيعانوا من المستلوحين !
لما تتزنق ف مواصلة وواحد يقف على رجلك ، اطلع انت كمان اقف على رجله ، وصدقني مش هيحس ولا هيهفهم
لأنه لوح
واللوح ، فاقد الاحساس بجسمه ، وبالناس .


انا رغاي ؟ ، بس مش لوح
وعشان كدة هسألكوا
انت لوح ؟ فاقد الاحساس بجسمك ورامية ع الناس وفاقد الاحساس بالناس ؟
خدت بالك من اللي بقولو دة قبل كدة ؟ او عملت الحل اللي انا توصلتلو دة ؟

1- مرض خلي اللحمة للأخر

- يمكن الشعب كله سمع اغنية حمادة هلال " لية كل حاجة حلوة عمرها قصير " ، مش بس سمعوه ، دول صدقوه وعاشوه كمان ، لدرجة ان دة سيطر على أذهانهم حتى وهما بياكلوا ! ، فبأت الناس دي مؤمنة جداً ، أن أكل الحاجات الحلوة الاول ، او الحاجات اللي بيحبوها ، هيخلي الاكل عمره قصير ! ، فيطولوه إزاي ؟
هحكيلكوا موقف
امبارح ، بالتحديد يوم الجمعه ، دخلت مطعم " Fast Food " ، ومش هقول اسمه عشان معملش اعلان ، وهو كنتاكي
انا وحده كدة لا داعي لذكر اسمها ، وبعدين كانت جعانة جداً ، كالعادة ! ، وقالت عايزة وجبة من اللي فيها 3 قطع فراخ ، ورز ريزو فراخ ، قومت ، طلبت الاوردر من البنت الكاشير اللي كالعادة زي لهطة القشطة ، وجبت الاكل وقعدنا ناكل ،
وافتكرت مرض " خلي اللحمة للأخر " ، وابتديت اراقبها وهي بتاكل عشان اعرف هي مصابة بالمرض ولا لا !
فضلت تاكل ف الرز والسلطة التافهة " الكلوسلو " وتاكل في البطاطس ، وسابت الفراخ للأخر
واخيراً ، كلت قطعة واحدة بس وشبعت !
راااااحت فلوسك يا صابر !، قطعتين فراخ هيترموا ف الزبالة ! ، وكل دة بسبب مرض " خلي اللحمة للأخر " !
طبعا ومن مبدأ وجع بطن ولا كب طبيخ ، أكلت انا الفراخ الباقية

بعيدا عن الحدة دي ،
اكتشفت ان كل المصابين بمرض " خلي اللحمة للأخر " ، نوعين مالهمش تالت ،
النوع الاول : القنوع !
ودة زي الاخت كدة ، سابت الفراخ ، مع انها داخلة اصلا عشان تاكل فراخ ، بس لما شبعت ، قالت شبعت
والنوع التاني : المعفن !
ودة هو اللي يسيب اللحمة للأخر ! ، ويمر بنفس المراحل بتاعة الاخت كدة ، بس في النهاية لو " سوري يعني " هيرجع من كتر الاكل ، لازم يدوس ويكمل اللحمة !

بالمناسبة ، انا مش معفن عشان أكلت بقية الفراخ بتاعتها ! ، بس كان في واحد تنح ، دخل المكان ومكنش لاقي ترابيزات فاضية ، فجه وقف جنبي هو والبنت اللي معاه وقال تعالي هنا نستنى لما يخلصوا ، فانا شوفتها فرصة اني افضل اكل الفراخ استخسار وارخم عليه !

،،،
بعد الحكاية العظيمة دي
عرفني بنفسك ، انت بتسيب اللحمة للاخر ؟
وانت قنوع ؟ ولا معفن ؟

أنــا ميـــن ؟


انا مين ؟ مش مهم انا مين ، ولا مهم تعرف عني ، ولا حتى تكون مقتنع بالكلام اللي انا هكتبوا هنا 

مش معنى كدة انك تدخل تتسلى ، او انك تخرج دلوقتي من المدونة ومتقراش حاجة ،،طيب وبعدين ؟ انا كدة تقريبا بطردك ! استنى بس قبل ماتخرج ولا تفهمني غلط ، كل الحكاية اني عايز اوصلك كم حاجة : 1- أنا حر تماماً في أرائي ، ومكفول ليا بحكم اني بني ادم ، اني اكتب اي حاجة ف اي وقت وعن اي حد ، طبعا بعدم الاساءة لبلاد او ديانات بعينها او او او او ... 2- أنت حر تماماً في تعليقاتك ، انا حتى بكفلك الحق انك تشتمني ، مش عشان في الحالة دي هحب شتيمتك ، لا ، عشان في الحالة دي هتكون انت انسان مٌهزأ ... 3- مفيش رقم تلاتة بشتغلكوا  4- انا اسف ع الاشتغالة اللي ف رقم 3 . ــ لو مٌصر بأة تعرف انا مين ، روح لملف التعريف بتاعي ، يمكن تلاقي حاجة تنفعك :D